■ تساؤل طرحه الدكتور خالد منتصر حول شائعات شطب وزير التعليم لدرس الجهاز التناسلى من منهج تالتة إعدادى، متمنيا أن يكون الخبر كاذبا وصادرا عن المتصحرين فكريا.. ملقيا اللوم على المجتمع الذى يعانى من ازدواجية.. يتكلم فى السر عن الجنس ليل نهار وعندما يخرج للعلن يدّعى الورع والتقوى والتعفف وعدم الفضول والرغبة. ■ ولكنى للمرة الأولى سأختلف مع الدكتور خالد.. أنا مع إزالة أى معلومات جنسية من مناهج الطلبة.. ومن أى مناهج.. يعنى ما حبكش يعنى.. ما هى باقى المعلومات متشالة.. اشمعنى ده يعنى اللى حايفضل؟!
■ فى بلاد الكفرة والزنادقة والعالم اللى داخلة النار حدف دى.. مهما عملوا.. انشاالله يطلعوا القمر فى اليوم ميت مرة كأنهم راكبين أسانسير مجمع التحرير.. يقومون بتدريس مادة اسمها بيوبرتى عن أعراض سن البلوغ.. يجيبوا العيال بدءا من سن العاشرة.. العيال اللى دارسة تشريح من وهمّا فى بطن أمهم.. ويشرحولهم ويأهلوهم للأعراض التى ستظهر على أجسامهم.. وبيفصلوا فى الكورس ده الولاد عن البنات عشان يتم التدريس بحرية وراحة، بعيدا عن الإحراج.. وبيجيبوا الأهالى يشرحولهم حايدرّسوا لأولادهم إيه بالظبط بعد استئذانهم ولهم حرية الرفض والقبول.. وبيعملوا تسجيل فيديو للحصص عشان الأهالى تتأكد إن المدرسين قاموا بطرح المعلومات العلمية دون إضافة أى فليفور أو مكسبات طعم للمادة.. يعنى دون إضافة أى آراء أو انطباعات شخصية.. وعشان الواد والبنت يعرفوا إيه اللى فى جسمهم ده.. ويتعاملوا مع تغييراته إزاى.. ويحموه ويدافعوا عنه ويحصنوه من الأمراض والميكروبات إلخ.
■ إنما إحنا حاجة تانية.. إحنا المستنيرين المتعلمين المؤمنين الورعين المؤدبين المتقدمين علميا وتكنولوجيا.. ما ينفعش معانا الكلام الفاضى ده.. بقى إحنا بنقول صوت المرأة عورة نقوم نرسم حاجاتها على لوحات وتابلوهات وبلاوى من دى؟؟.. والمدرس يقعد يشاور بالعصاية كده على مواطن العفة عينى عينك قدام الصبيان.. دول قنابل موقوتة.. كل عيل من دول شايل بمبة جواه بتعمل تيك تيك تيك.. لو مالاقاش بنت يطلع فيها كبته بيتدور عالواد اللى جنبه.
■ إنت ما شفتش الشيخ الشاب القمور وهو لابس بنطلون جينز محزق وواقف بيلقى درس على قناة تليفزيونية وهو حاطط مانيكانات لابسه البودى والاسترتش تحت الحجاب.. وعمال يشاور على مواطن العفة ويتألم ويتأوه إنه مضطر يشاور ويركز بالعصاية عالحاجات ويشرح إن الحجاب ما يتلبسش عالحاجات دى؟؟.. ده كان برنامج مسلى جدا.. أرجو الاطلاع يا دكتور قبل ما توجه دعوة ماجنة زى دى بتدريس الجهاز التناسلى.
■ إحنا أقصى علم ممكن ياخده الولد.. ومش حانتكلم عالبنات.. هو إنه يروح يسأل أبوه عما يقبع فى النصف الأسفل من جسمه.. فالأب يضرب لخمة ويشخط فيه ويقوله امشى خش على أودتك.. فالواد يدخل عشان يتعامل مع نفسه ويكتشف بقى العالم الغريب.. وينزل ياخد درس خصوصى عند البوابين والسواقين وأطفال الشوارع البالغين..
■ وبعدين يا أخى ربنا ما يجعلك من قطاعين الأرزاق.. عايز العيال تفهم؟؟.. أمال بيزنس الفتاوى ده يعيش على إيه؟؟.. دايرة الاستثمار والأموال التى تضخ بجنون فى البيزنس ده تروح فين؟؟.. نعيش إزاى إحنا من غير فتاوى إرضاع الكبير وحرمانية شراء الكوسة والخيار صحاح ووجوب تقطيعهم ترنشات قبل الدخول على بنات الأسرة.. مع جواز شراء الموز صحيحا عشان بيتفعص.. وحرمانية القعاد عالكراسى والجو ده؟؟.. إنت شكلك قابض م الموساد عشان تدمر اقتصاد البلد وتقضى عالمشروعات الاستثمارية والأموال التى تضخ فى القنوات التليفزيونية اللى رجعوها دى.. نعمل إيه إحنا بدون قضايا تحرش وهتك عرض واغتصاب المدرسين للطلبة والطالبات.
■ طب لما يدرسوا المادة دى للعيال يغتصبوهم إزاى بقى؟!.. والعيال لما يفهموا حايتحرشوا ببعض ويقطعوا أعضاء بعض إزاى؟!.. مش دى أرزاق للصحف اللى بتنشر والمحامين اللى بيترافعوا ورسوم المحاكم اللى بتتدفع؟.. ولما الناس تفهم نعمل إيه فى الخسارة الفادحة اللى حاتصيب دايرة التقاضى بأكملها؟!.. نُص قضايا الطلاق والخلع أسبابها خيبة جنسية وجهل وحمورية وعنطزة ذكورية.. نقفل بقى؟.. بلاش.. نسرح بلب وسودانى بدل ما كنا سارحين بقضية ختان الإناث ونازلين فتى ورغى ف كل حتة..
■ يعملوا إيه دكاترة الشقق والمستوصفات والعيادات المشبوهة اللى بيعملوا عمليات إجهاض وترقيع غشاء بكارة واللاذى منه.. مش كل دول ماحدش حايعبرهم لو العيال فهمت النيلة اللى شايلينها فى أجسامهم دى بيتعمل بيها إيه وما يتعملش إيه؟!.. نقفل الملاجئ بقى اللى مليانة عيال مولودة ومرمية تحت الكبارى بسبب إن البنات فهموا ووعيوا؟.. بتوع تجارة الأطفال يروحوا يعنى؟.. نبطل ننتج أطفال شوارع بقى؟.. دا إحنا بنتحدى العالم فى القدرة الإنتاجية لأطفال الشوارع.. وابتدينا نصدرهم حتى.. نقفل أوكار الدعارة اللى مزروعة فى الأبواب الخلفية للكافيهات؟!
■ نوقف النشاط الاستثمارى بتاع «اشحنلى وأعرضلك»؟.. نقضى على مواقع البورنو العربى اللى ملت النت ببنات محجبات ومنقبات مش فاهمين أى حاجة ومتساقين زى البهايم عشان يتصوروا وهما مش عارفين؟.. حانهزر بقى يا دكتور؟!
■ شركات الأدوية تجيب ضُرفها عشان بضاعة الأمراض التناسلية حاتبور؟.. عايز الناس ما يجيلهاش إيدز وفيروس سى وباقى الليستة؟!
■ لما البنات تفهم.. الثقافة الذكورية المتعصبة والحَجْر والقهر والظلم وضيق الأفق والتعصب والغباوة ونفشة الصدر والفار اللى لابس بدلة أسد حاتنهار..
■ أنا أقولك حاجة أحسن.. بدل ما تنادى بتدريس الثقافة الجنسية، مطالبا بأن يتعرف الأولاد على نصفهم الأسفل.. نادى بقطع النصف الأسفل ده من أصله.. ورميه فى الزبالة.. انشاالله لمدة ربع قرن بس.. تخيل نوع السلام الذى سنعيش فيه.. وكم الحناجر التى ستخرس.. والقنوات اللى حاتقفل.. والحمقة اللى حاتفش.. كأنك رميت مية ساقعة على براد بيغلى.. يمكن ساعتها نفوق لحقيقة إن الإنسان عنده نص فوقانى ويحمل داخل تجويف دماغه حاجة اسمها مخ مش طبق كشك ساقع.
