سأل مبارك نظيف : ايه رأي الشعب فيّ ؟
نظيف : قرفانين و بيشتموا .
مبارك : طيب أنا عايز أعمل حاجة تخلي الشعب يحبني .
نظيف : خير يا ريس .
مبارك : اعملوا مشكلة في البلد و الناس تقرف زيادة ، آجي أنا أحل المشكلة فالناس تحبني .
نظيف : وايه هي المشكلة يا ريس ؟
مبارك : قلل المرتبات للنص .
قام نظيف مقلل المرتبات للنص . الناس في الأول اتضايقت لكن بعد كده قالوا : حسبى الله و نعم الوكيل . و عاشوا حياتهم و تكيفوا مع الوضع الجديد .
مبارك : هيه ... ايه الأخبار يا نظيف ؟ الشعب عامل ايه ؟
نظيف : مفيش يا فندم ، اتضايقوا في الأول لكن بعد كده عادي .
مبارك : طيب زوّد الأسعار .
نظيف زوّد الأسعار . الناس في الأول اتضايقت لكن بعد كده قالوا : حسبى الله و نعم الوكيل ، يعني المرتبات تقل للنص و كمان الأسعار تزيد ! و عاشوا حياتهم و تكيفوا مع الوضع الجديد .
مبارك : هيه ... ايه الأخبار يا نظيف ؟ الشعب عامل ايه ؟
نظيف : مفيش يا فندم ، اتضايقوا في الأول لكن بعد كده عادي .
مبارك : طيب بص ، حط قدام كل كوبري واحد ياخد من كل عربية طالعة الكبري 10 جنيه .
نظيف عمل كده . الناس في الأول اتضايقت لكن بعد كده قالوا : حسبى الله و نعم الوكيل ، كمان رسوم على عبور الكباري ! و عاشوا حياتهم و تكيفوا مع الوضع الجديد .
مبارك : هيه ... ايه الأخبار يا نظيف ؟ الشعب عامل ايه ؟
نظيف : مفيش يا فندم ، اتضايقوا في الأول لكن بعد كده عادي .
مبارك : طيب بص ، حط عند آخر كل كوبري واحد ياخد من كل واحد 10 جنيه و يضربه قفا !
نظيف عمل كده .
مبارك نزل البلد بقه يشوف بنفسه اللي بيحصل . فلقى زيطة جامدة عند آخر الكوبري و زحمة و عربيات كتير و واحد عمال يزعق و يقول : مش معقول بقه اللي بيحصل ده . ده حرام و الله . ايه البلد دي ، فين الريس . ايه الظلم ده .
مبارك قرب منه و سأله : خير يابني فيه ايه ؟
رد قال له: مش معقول اللي بيحصل ده يا ريس . مش توقفوا ناس كتير تضرب بالقفا عشان نمشي بسرعة ؟!
